عزيزى اتحاد الطلبة بكل احترام اقول لك ......... طز فيك :) اوعى تزعل

عزيزي اتحاد الطلبة ....................................... طز فيك

J

صباح الخير او مساء الخير حسب ما تقرا الموضوع النهاردة جاى احكيلكم عن حاجة سخيفة جدا اسمها انتخابات اتحاد طلبة هى مش سخيفة هى هزلية اكتر منها سخيفة و كمان المفروض مش اسمها انتخابات ممكن تسميها تربيطات ، استعباطات اتحاد الطلبة اى حاجة تيجى على بالك و انت بتكرهها ، احكيلكم الحكاية بقي:

فجاءة بلا اى مقدمات ظهر هرج و مرج في الكلية ... ايه يا جماعة اللى حصل ؟؟؟ انتخابات اتحاد الطلبة؟؟؟ اتحاد الطلبة ده بيبع ايه ده؟؟؟ مش عارفين بس احنا هنرشح نفسنا فيه هههههه  المهم الوضع كالتالى اسرتين هما اللى بيحصل بينهم صراع و التالتة تعتبر البركة بتاعت الكلية او تقدروا تقولوا الفاسوخة ده حتى الدكتور اللى بيشرف على الاسرة بيتريق عليها كل واحد نزل بالمرشحين بتوعه تلاقى و انت قاعد مع اصحابك  واحد نزل عليكم زى البراشوط و يقولك انا فلان بن علان مرشحكم عن اللجنة الثقافية او اى لجنة و يقعد يقولك رشحنى و انا الاحق و انا اللى دهنت الهوا دوكو و الكلام البتنجان ده المهم تسأله تعرف ايه عن اللايحة بتاعت الطلاب ميحطش منطق  طب انت مرشح عن اللجنة الثقافية عملت ايه عشان تترشح يقولك شاركت في برنامج مسابقات ههههههههههه طب انت هتعمل ايه لما تبقى عضو اللجنة الثقافية يقولك هساعدكم ، ازاى؟ يقولك هجيب لكم ورق امتحانات السنين اللى فاتت ،بس؟؟؟ امال انتم عاوزين ايه؟؟؟؟ و طبعاً كل شوية يجيلك واحد و يعمل نفس الكلام و في الاخر نكتشف ان محدش منهم عارف حاجة عن اللايحة و لا فكر يشوفها و معندوش اى تفكير هو هيعمل ايه لما يبقى عضو اتحاد طلبة هو بس داخل عشان يتكتب اسمه في اتحاد الطلبة و المشكلة ان اتحاد الطلبة ده حاجة ملهاش اى قيمة نظرا لان اللوايح اللى عدلها الريس الراحل انور السادات خلته زى عدمه ميعرفش يعمل حاجة من غير الرجوع للامن، المهم الانتخابات يوم الاثنين ( اللى هو اجازة في جدولى) كل ما حد يقولى انتخبنى اقوله ربنا يسهل  ، الانتخابات يوم الاثنين ابقى تعالى عشان تنتخب اقوله اخ ده الاجازة بتاعتى معلش تتعوض الانتخابات الجاية هههههههه يقولى لازم تيجى و يدينى ورقة عبارة عن اعلان الاسرة و مكتوب في الاخر ايه قرآنية متعرفش ايه اللى خلاه يحطها مع انه متأكد ان الناس بترمى الورق ده بس اهو عامل نفسه راجل تقى  واحد تانى يدينى ورقة مكتوب فيها ( مش مهم تنتخب مين المهم تنتخب ليه؟؟) و طبعا مش حاطط اجابة ويسيبك حيران مش عارف ايه اللى هتستفاده لما تنتخب، كان في ناس اصحابى مرشحين نفسهم في اللى انتاخابات  معظمهم طبعا مش عارفين حاجة عن لوايح و لا دور الاتحاد و لا ايه المطلوب منهم  العملية بتنجان انتم عارفين ان الزن على الودان اقوى من السحر كلمة من هنا و كلمتين من هناك عصرت على نفسى لمونة و قولت لهم نازل الاتنين و امرى الى الله  و جاء يوم الاتنين المشهود نازل في امان الله على الكلية و بطلع من محطة جامعة القاهرة عشان اخش الجامعة قوم لاقى ايه؟؟؟؟؟؟  عربية امن مركزى من النوع الضخم و حبة عساكر امن مركزى واقفين و قافلين باب كلية اعلام و الناس واقفة كتيييييييييير و محدش بيفتح اليوم باين من اول المهم رحت اخش من باب تجارة نفس النظام عربية امن مركزى و الناس واقفة كتيييير بس الباب كان مفتوح و الامن لازم يبص على الكارنيه اللى بياكد انك تبع الجامعة عشان العناصر الخبيثة و ابناء الشياطين ميدخلوش و يحاولوا يبوظوا الانتخابات المهمة جدا جدا جدا جدا جدا و ده طبعاً بالعكس ههههههههه الناس حاولت تهجم هجمة رجل واحد عشان يخلصوا من الزحام و يوصلوا لكلياتهم طبعاً الامن الهمام معجبوش الفوضى دى راح قفل البوابة ههههههه خلت الناس تمشى تشتم في اللى عمل انتخابات الطلبة و اللى جابها و في الامن ( دستور يا اسيادنا) فضلنا نمشى لغاية باب اقتصاد و علوم سياسية  واخيرا دخلنا الجامعة المصونة انا كنت قدام الجامعة الساعة 11 دخلتها 11 و نص ده كله عشان خوف الامن على مصلحتنا و انتخاباتنا الجامدة جداً وصلت الكلية بعون الله و قولت اشوف الانتحابات عشان انتحب على عمرى طلعت لجنة الانتخابات لقيت زحمة كتير قلت يا سلام الكلية كلها عاوزة تنتخب لسة بقول الكلمتين دول لقيت واحد من اصحابى بيقولى ينتخبوا ايه دول تبع الاسر اللى مرشحين نفسهم طب و اللى انتخبوا ؟؟ مكملوش 50 واحد بالنسبة للسنة بتاعتنا  ههههههههههه خش انتخب قولت اخش ليه ما انتم مكملتوش النصاب القانونى يعنى ناقصكم 200 واحد يبقى هتحصل اعادة بكرة خليها بكرة بقى انتخبكم على راحتى  قلى لا لازم تخش يا راجل  قولتله ماشى جاى اخش لقيت كل واحد من اسرة بيشدنى و يقولى متنساش و يروح راصص اسامى المرشحين بتوع الاسرة و يقولى انتخب اما الاسرة الفاسوخة فأثبتت انها بركة بجد جايبن صندوق فيه حلاوة معلبة ( من افخر الانواع) ههههههه و بيوزعوا منها على الناس حاجة مسخرة و المضحك ان اللى مرشحينهم مش لهم امل في حاجة خالص يعنى المرشحة للجنة الرياضة انا عن نفسى اشك انها جربت تجرى في الشارع قبل كده و المرشحة عن اللجنة الاجتماعية محدش يعرفها مجهولة الهوية هههههههه و من ده كتير المهم دخلت اوضة الانتخابات لقيت واحدة من مرشحين الاسر واقفة هناك و بتكلم اللى بيكتبوا انهم يكتبوها  و المراقبين قاعدين و لا كأن حاجة بتحصل قدامهم  المهم كتبت اللى فيه النصيب و خرجت قعدت مع اصحابى برة اللجنة شوية و لقيت زعيق و شتيمة و خناق ايه اللى حصل ؟؟؟ ولد ضرب بنت ليه كده؟ اصلها من الاسرة المنافسة فقلت الناس دى  مش طبيعية المهم كل اسرة جابت رجالتها و كانت هتبدا معركة لولا ان الامن جاء طبعا بتاع الامن معندوش وقت يستفسر ايه اللى حصل بقى يزق الناس و يزعق  و اختفى كل اللى واقفين قدام اللجنة و فضل واقف الامن لغاية ما هديت الامور الحالة دلوقتى انه 70 واحد انتخبوا ولسه فاضل ساعتين و تخلص الانتخابات و يضطروا للاعادة قعدت كل اسرة تشحت ناخبين لغاية الساعة 3 ميعاد قفل الصناديق و يا دوب كملوا النصاب القانونى و عدوا بكام واحد و جت عملية فرز الاصوات و الناس فضلت للساعة 8 عشان تعرف النتيجة  اللى كانت : الاسرة البركة و لا واحد منها نجح الاسرتين التانيين كل واحدة خدت 6 مقاعد و ناس زاطت من الفرحة و ناس قعدت تعيط لينتهى يوم مجيد اخر من ايام مصر المحروسة بتقاسم السلطة الوهمية بين  اسرتين ليس بفكرهم و مشروعاتهم لخدمة الطلاب و لكن بالتربيطات و الاصحاب و الاقارب و نشكر الخالة سوسن لحسن تعاونها في انتحابات الظلمة