عودة بعد الامتحانات و ما حدث فيها

كح كح كح.................. يا ساتر يا رب ايه التراب ده كله ...كح كح

ياه الواحد بقاله قد ايه مجاش هنا حوالى 3-4 شهور معقولة الواحد يسيب المكان الفترة دى يلاقيه مليان تراب قد كده بس سبحان الله التدوينات زى ما هما محصلهمش حاجة بس ايه ده عداد الكهربا قصدى عداد الزوار شكله بايظ معدى ال500 زائر ازاى؟؟ مش عارف!! يظهر انى سبت الباب مفتوح قبل ما امشى ما علينا طبعاً ناس هتسأل كنت فين الوقت ده كله؟؟؟ اطمنوا مكنتش فى السجن بس كنت فى حاجة شبهه اسمها معتقل الامتحانات طبعا مش قاعد بمتحن 4 شهور لا انا الاول امتحنت امتحانات نص الترم و بعدها مش عارف قد ايه بدات امتحانات اخر السنة انا سامع واحد بيقولى حضر نفسك عشان تدينا حلاوة النجاح ههههههه حلاوة ايه يا بنى ده انا محتاج معجزة عشان اعدى الترم ده الصراحة يا جماعة الترم ده كان اصعب ترم شفته فى حياتى و متسألش ليه لأنى لغاية دلوقتى مش عارف ايه اللى حصل اصلى شغال بالنظام اللى شغال فى كل الجامعة افضل نايم و متذاكرش و تعالى قبل الامتحان بكام يوم و ذاكر النظام ده زى الفل اشتغلت بيه سنة و نص اول سنة جبت جيد جدا و الترم الاول جبت امتياز انما الترم ده مش باين له اى تقدير انا دلوقتى بعمل حساباتى عشان اجيب مقبول تخيلوا الكارثة اللى انا فيها يلا مش مشكلة المهم الواحد يعدى الترم ده بس تصدقوا الامتحانات دى تخلى الواحد يتعرف على ناس كتيييييييييييير طبعاً هتقولى ازاى؟؟؟ بص لو انت ولد شاطر كده و عامل ملخصات للمواد و معروف انك مجتهد هتبقى شخصية مشهورة جداً جداً جداَ يعنى انا اعرف واحد صاحبى طول النهار شغال يكتب المحاضرات و يلخص و زى الفل كل شوية يجى ناس ميعرفهمش و يسلموا عليه و احنا قاعدين بعد ما يمشوا اسأله مين دول؟؟؟ يقولى و النبى يا بنى ما عرفهم كل الحكاية انهم صوروا كشكول المحاضرات بتاعى و نقعد نضحك هتقولوا طب انت يعنى بتعرف الناس دى عن طريق صاحبك اقولكم لا شوفوا انا منفعش فى الكلام ده صراحة مش بستحمل اقعد اكتب المحاضرات و بعد كده انقلها فى كشكول تانى و الكلام ده ... انا لو المادة لها كتاب  يبقى خلاص اسمع المحاضرة و ابقى اذاكر منه اما لو المادة مش لها كتاب زى المادتين اللى كانوا عندى الترم ده يبقى اخدهم من زمايلى الفالحين طبعاَ ده مش كسل منى الحكاية انى مش بعرف اتابع الدكاترة يعنى مثلا عندى دكتور لمناهج البحث الدكتور ده مشوش و مش مرتب افكاره اصلا يعنى يكون بيتكلم فى موضوع و الناس بتكتب وراه فجأة يروح يخش فى موضوع تانى من غير ما يقول و بعد كده يقولهم على فكرة و يروح ناقل للموضوع الاولانى تانى طبعاًِ الناس بتخلط و محدش عارف فين اول الموضوع من اخره انا صراحة كتبت مرتين وراه و كنت بشد فى شعرى فبطلت اكتب وراه نرجع للسؤال انت ازاى بتعرف ناس فى الامتحانات؟؟؟ شوفوا انا كل المواد اللى كانت عندى مش ملخصها و لا كنت اعرف عنها اى حاجة ما عدا مادة واحدة الترجمة الصحفية بالنسبة ليا كانت اسهل مادة لأنها ترجمة من انجليزى لعربى و كانت بسيطة الامتحان عبارة عن 3 قطع من رويترز او اسوشيتدبرس و ترجمهم و خلاص كده المهم دكتور الترجمة مجاش غير 3 محاضرات قبل امتحان نص الترم فطبعاً الطلبة هاجت عليه عشان الامتحان قرب و هو كل اللى عمله قالهم اساسيات الترجمة  و ترجم 5 قطع فالدكتور حب يراضيهم راح عمل ايه؟؟؟ حدد لهم القطع اللى هتيجى فى الامتحان كانوا عبارة قطعتين من 3 قطع هو مش مترجمهم بس كانوا معانا و قالنا ترجموها و هتلاقوها فى الامتحان طبعاً معظم الطلاب الانجليزى بتاعهم كسيح محتاج ترميم المهم انا جبت ال3 قطع و ترجمتهم و كتبتها على ملف وورد و طبعت نسختين واحدة ليا و واحدة لزميلى اللى انا قولتلكم عليه فوق (هو اه شاطر فى بقية المواد بس ميعرفش فى الانجليزى)و عشان مكدبش بعتها لواحد تانى على الميل عشان هو حالتها صعبة جداً(سقط ترم) فقولت بلاش يكمل سنة بحالها المهم اديت لزميلى الشاطر نسخته و الواد ده على فكرة بتاع بنات يعنى مستعد يعمل اى حاجة عشان يبقوا جنبه المهم كان فى بنت نعرفها شافتنا و هو بياخد النسخة منى جت بتسأل ايه اللى معاكوا ده قولتلها مفيش انا كان فى نيتى ان عدد صغير هو اللى يعرف الترجمة بس عشان منعملش مشكلة و يقولوا الامتحان اتسرب للطلبة المهم سبته معاها و مشيت بعدها بيوم لقيت كل البنات اللى هو يعرفهم معاهم نسخة من القطع المترجمة و كمان لقيتهم كل ما حد يسالهم جبتوا الترجمة دى منين يشاوروا عليا و كل ما امشى فى الكلية الاقى ناس بتسلم عليا و يقولوا متشكرين على الترجمة و ربنا يكرمك زى ما ساعدتنا و طبعاً انا واقف ببتسم ببلاهة و عاوز اخنق اللى عمل الحركة دى و قولت لنفسى ده لو الدكتور عرف هيموتنى  بعد كده جه اليوم بتاع امتحان الترجمة لسة فى ناس مش عارفها بتسلم عليا لا و ايه فى ناس عاوزة تقعد جنبى باللجنة شفتم مسخرة اكتر من كده المهم لقيت اللى اعرفهم و  اللى مش عارفهم قاعدين جنبى فى اللجنة و المضحك انهم بالرغم انه كان معاهم الترجمة كانوا بيسألونى فى وسط الامتحان ههههههه عارفين بقى زميلى اللى انا قولتلكم شايل ترم و الورق بتاع الاسئلة بيتوزع سأل واحد من اللى استلموا الورقة الدكتور جايب انهى قطع و لما عرف بدأ يكتب فى ورقة الاجابة المراقبة بتسأله بتعمل ايه؟؟؟؟ قالها متخافيش انا حافظ الامتحان ههههههه بعد  الامتحانات ما خلصت كنت قاعد مع جماعة اصحابى نتكلم فجت سيرة امتحان الترجمة فواحد بيقولى انت عارف الورقة دى جت منين فضحكت و قولتله لا جت منين؟؟؟ قالى ناس اصحابنا دخلوا النت و جابوا الترجمة العربى من رويترز و طبعوها انا مقدرتش امسك نفسى من الضحك قعدت اضحك و الناس بتبصلى فواحد سأله انت قولتله ايه؟؟؟ قاله انا كنت بقوله جبنا الترجمة منين... قاله يا اهبل ده هو اللى مترجمها !!!!!!!!!!!حاجة تضحك المهم جه امتحان اخر السنة فى الترجمة انا قبلها كنت بقولهم مش هغشش حد خلاص انتوا كنتم هتفضحونى فى الميدتيرم قالوا ماشى جه الدكتور قبل الامتحان قلهم الامتحان اربع قطع 2 بس من اللى انتم درستوهم و الباقى مش عندكم  الناس اترعبت ازاااااااااااااااااااااى يا دكتور ؟؟؟ مينفعش يا دكتورررررررررررر؟ قالهم انا اديتكم فرصة فى نص السنة عشان تجمعوا درجات كفاية عليكم كده طبعا كل اتلم على الدكتور و قعدوا يزنوا عليه قالهم خلاص ابقوا ترجموا 3 بس قالوا له انهى قطع قال انتم بتهزروا ما اديكم الامتحان و خلاص ناس قالوا له يا ريت يا دكتور ههههههههه قالهم لا خلاص كده لما يئسوا من الدكتور الناس اللى اعرفها و اللى معرفهاش بصوا ليا و قالوا لى انت اللى هتغششنا ههههه بصتلهم و قولت ربنا يسهل و كان ف دماغى تخطيط رهييييييييييييييييب عشان اهرب منهم و اللى اكتشفت انه تخطيط عبيط خالص شوفوا انا كنت مخطط انا اجى الامتحان متأخر عشان تكون كل الاماكن مشغولة و مش يفضلى غير مكان بعيد عنهم و بالتالى مش هيغشوا منى و لو كلمونى هقولهم اعمل ايه انا جيت متأخر و كنت بعيد عنكم اعمل برئ يعنى المهم جيت متأخر تخيلوا ايه اللى حصل لقيت كل الاماكن محجوزة ماعدا مكان واحد اللى هو وسط الجماعة دى و قفت متسمر مش عاوز اروح و هما ينادوا تعالى تعاااااااااالى طبعاً عملت نفسى اطرش  راح جه دكتور و شاور على المكان اللى هما حجزينه لياو قالى اقعد بصيتله و قولتله مفيش غير المكان ده قالى هى كافيتريا تختار المكان اللى يعجبك   قعدت جنب حبايبى دول و بدات مجزرة الغش و البركة فى صوت التكييف بيغطى على الاصوات التانية و قعدوا ماسكين ودانى و يعنى ايه الكلمة دى؟؟ واحد تانى يقولى بص انا ترجمت القطعتين اللى خدناهم و فاضلى الثالثة ترجمهالى بسرعة كده يلا .... مش عاوزنى اديك القطعة التانية و تدينى القطعة الثالثة(نظام مقايضة) انا الاول كنت مطنش بس مش عارف ايه اللى حصل و لقيت قطعة من اللى احنا خدناهم مش عارف احطها بالصيغة اللى الدكتور قالها ( اصل الدكتور بيدقق فى الحاجات اللى مترجمها لازم تحطها بنفس الطريقة اللى عملها بيها ) نظامه كده فقولت للواد بتاع المقايضة و عينك ما تشوف الا النور اللجنة بقت كلها هايجة و كل الناس عاوزة تغش و المراقبين و الدكاترة يا ولاد اسكتوا يا جماعة انتوا فى لجنة امتحانات انت يا بنى ( اللى هو انا ) انت عمال ترغى مع زمايلك بطل هسحب منك الورقة انا كنت بفكر اخليه يسحبها بش المشكلة انى لسه مكتبتش القطعة الثالثة اللى انا غششتها للجماعة المهم  خلصنا عملية الغش الجماعى و مشيوا بس انا مرضتش امشى صراحة حسيت انى بوظت الدنيا رحت عملت ايه ؟؟؟ رحت مترجم القطعة الرابعة هو صحيح مكنش ليه لازمة بس حاولت ارضى ضميرى عارف بضحك على نفسى بس اعمل ايه ؟؟؟ يلا مضطر امشى دلوقتى عشان رايح كورس الانجليزى فى الجامعة الامريكية

و السلام ختام