صباح ا لخير       

مش عارف يا جماعة اذا كنتم حاسين بالمشكلة دى و لا لأ بس انا هقول و خلاص مش هخسر حاجة انا من الركاب المنتظمين للمترو عارفين انتم القطار اللى بيمشى على قضيب هو ده دايما بركبه عشان اروح الكلية معرفش غيره و مش عارف لو حصل عطل ليه هروح الكلية ازاى؟ ربنا يستر محاضراتى بتبدأ الترم ده من الساعة 9 و المشوار بالمترو بياخد ساعة يعنى اكون فى المحطة على الساعة 8 اوصل الكلية بالضبط  المهم بكون لابس هدومى و موضب نفسى و ماسح الجزمة عشان المنظر مش معقول طالب بكلية اعلام و ماشى مبهدل ابص المراية و اتوكل على الله و انزل 10 دقايق اوصل المحطة و استنى المترو يجى طبعاً المحطة عليها امة لا اله الا الله و متعرفش يعنى ايه الفراغ يجى المترو انا اول مرة رحت اركبه كنت فاكر انه لاننا المحطة التانية فى الخط يبقى هيكون المترو فاضى بس اول ما ببص عليه الاقى امة لا اله الا الله التانية فيه هههههههه يبقى امة جوة و امة برة و تخيل المنظر عند بوابات المترو الصراحة المترو بتاع اليابان مش حاجة بالنسبة لبتاعنا هناك بيقولوا عينوا ناس عشان يزقوا اللى داخلين المترو احنا مش محتاجين الناس قايمة بالواجب و زيادة المهم لما بكون نازل بدرى بفوت اول مترو طبيعى عشان الزحمة تخف شوية انما لما اكون متأخر لا يمكن افوته وده بيفكرنى يوم جمييييييييييييييييييييييييييييل جدا كنت رايح فيه الكلية مش فاكر كان يوم ايه بس اللى فاكره انها كانت محاضرة من 2-5 مادة مدخل ادارة علاقات عامة و كان السنة اللى فاتت و كان اليوم اخر مباراة فى بطولة العالم للاندية اللى الاهلى جاب فيها المركز الاخيرة بكل جدارة ههههه كانت اخر محاضرة و اهمهم لانه هيحدد ايه اللى المفروض نذاكره عشان الامتحانات كانت قربت المهم نزلت من البيت بدرى و رحت المحطة و طبعاً كانت مليانة ناس متعدش رحت مفوت اول مترو و استنيت التانى اللى للاسف اتأخر عن ميعاده و بالتالى الناس بقت اكتر من الاول اول ماجه التانى لقيته زحمة برضة مكنتش عاوز اركب عشان الناس بتبقى صعبة فى الزحمة المهم جيت ارجع لورا عشان ابعد عن الباب ببص ورايا لقيت سد من الناس منع الرؤية فجاة باب المترو فتح ولقيت نفسى بدل ما ارجع لورا بطلع لقدام بقوة من اغير ما اتحكم فى رجليا لقيت نفسى جوة المترو متعرفش ازاى  قولت مش مهم ادينى ركبت اوصل بدرى 10 دقايق مش هتخسر حاجة  المترو وصل للمحطة اللى بعديها و برضه كانت زحمة باين مصر كلها  قررت فى اليوم ده انهم يركبوا مترو و المضحك ان المترو مش يمشى على طول لا ده بقى يقف فى كل محطة 10 دقايق كأنه مش مكفيه اللى جوة عاوز يزود عليهم لغاية ماوصلت محطة انور السادات و هناك بغير و اركب الخط التانى و احسن حاجة فى الخط التانى انه جديد و محطاته قليلة  جيت انزل المحطة اللى كانت زحمة هى كمان يا دوب حطيت رجل على رصيف المحطة و جاى احط التانية لقيت اللى داخلين شاينى هيلا هوب و مدخلنى معاهم هههههه بالقوة  نزلت محطة سعد زغلول و طبعا انا اشتراكى مش يسمح ليا انا انزل بعد السادات فى الخط الاول حطيت الاشتراك فى الماكينة صفرت قولت مش مهم تلاقيها بايظة حطيته فى اللى بعديها دخلتنى كنت عارف ان نزولى المحطة هيعمل مشكلة بس طنشت و المترو جاى سمعت المشرف  ينادى و يقول هاتوا الكابتن ده و كان الكلام عليا طبعا عملت نفسى مش سامع و اول ما المترو فتح دخلت و الراجل بيزعق هاتووووووووووه و رجعت لمحطةالسادات و رحت الخط التانى و المترو جه وكان فاضى ركبته و حمدت ربنا و وصلت محطة جامعة القاهرة المصونة كانت الساعة 1:45 لسة فيه امل اوصل قبل ما المحاضرة تبدأ و لكن و اه من كلمة لكن بدخل التذكرة بتاعت الاشتراك الماكينة صفرت و لانها كانت اول سنة اعمل اشتراك و لانى غشيم مش ليا فى امور الفهلوة حطيت التذكرة فى الماكينة اللى واقف جنبها احد المشرفين على المحطة و اللى ما صدق انها صفرت و قالى ورينى اللى الاشتراك اه افتكرت ده

كان يوم 18 لان الاشتراك كان خلصان فى يوم 17 الراجل قالى الاشتراك ده خلصان غرامة عشرة جنيه قولت له اه و بعدين قالى لازم تدفع الغرامة قولت له جت على يوم قعدت اتكلم معاه و احاول اخليه يعدينى من غير غرامة و هو مش بيقول غير جملة واحدة (غرامة عشرة جنيه ادفع)كان ناقص يقول هذه رسالة مسجلة من فضلك قولت لنفسى خلاص ادفع الغرامة عشان تلحق المحاضرة و اضطريت ادفع الغرامة بعين دامعة و قلب باكى طلعت العشرة جنيه قالى استنى عشان احرر لك الغرامة و الظاهر ان الحاج كان واخد شهادة تعليم بالعافية لانه قعد كتير عقبال ما كتب اسمى المهم ادانى ورقة بالغرامة و قالى ابقى جدد اشتراكك بصيت فى الساعة كانت 2 الا 5 دقايق قعدت امشى بسرعة عشان الحق يجى بتاع الامن عند باب الكلية بكل رذالة و يقولى الكارنيه قولتله متخافش انا تبع الكلية و ورايا محاضرة و مشيت وسبته و عند باب مدرج  2 كان الفصل الاخير من مأساتى لقيت قسيم واقف عند الباب و قسيم ده افغانى بس بيتعلم هنا كان مين بقى واقف معاه يا حلوين الدكتوووووووور بسمع الحوار لقيت ان الدكتور مش عاوز يدخل حد وراه و قسيم يتأسف لأنه اتأخر ببص فى الساعة لقيتها 2 بالضبط فى الاخر لقيت الدكتور بيقول لقسيم شوف يا بنى انا عندى السكر و الضغط و القولون العصبى و مفيش حد هيدخل ورايا طبعاً قولت خلاص اليوم ده ضلم على الاخر بس عملت اهم حاجة و هى انى اتصلت بزميلى اللى جوة المحاضرة و قولت له يكتبنى فى الحضور عشان اعمال السنة خرجت من الكلية و انا على استعداد كامل انى اضرب اللى يكلمنى نص كلمة عن اى حاجة رجعت البيت و طبعاً السؤال الطبيعى كان رجعت بدرى ليه مردتش و رحت نمت و كفاية كده عشان الفجر اذن و لازم امشى بس قبل ما امشى لازم نستخلص بعض العبر من اللى انا كتبته و هى الاتى

أ- انه مش معنى ان ماكينتين بايظين فى محطتين مختلفتين( اللى هى محطتى و محطة سعد زغلول)انك ممكن تهرب من ايد العدالة و بالذات فى محطة جامعة القاهرة

ب- اتاكد ان اشتراكك سليم

ج-اتاكد ان الدكتور بتاعك مش عيان بأى مرض و الا مش هتعرف تتكلم معاه زى الافلام هتخالفه يروح ماسك جنبه الشمال و يقولك قلبى قلبى قتلتنى يا مجرم

د- اوعى تدفع الغرامة متبقاش عبيط (ده اللى قاله كل اللى سمع الحكاية) ناس فاهمة الموضوع

ه- متحاولش تمشى ضد التيار شوف انا حاولت مركبش المترو امشى ضد التيار اهو التيار خدنى و دخلنى بالعافية 

ه - النصيحة دى بقى ليا انا (شوف يا بنى لما تكون هتكتب فى موضوع معين متسرحش و تكتب فى موضوع تانى ركز شوية الله يخليك)لو خدتوا بالكم اول الموضوع بالوش دعوة ببقية الموضوع

و السلام ختام