عمرك جربت تكتب يومياتك؟؟؟ تكتب كل حاجة بتمر بيها كل يوم صحيت امتى و عملت ايه اول ما صحيت و رحت فين و عملت ايه و رجعت بيتك امتى و كلت ايه و كلمت مين و شربت ايه  و الكلام ده كله انا عن نفسى عمرى ما جربت  بس فكرت فى الموضوع ده كذا مرة بس عمرى ما بدأت فى تنفيذه و متسألش ليه؟ ممكن عشان انا مش  جرئ او مش بحب اللى اكتبه يقع فى ايد حد اعرفه ما علينا من مدة كده كنت عمال اقلب فى المدونات اللى موجودة هنا لقيت موضوع عن كتابة اليوميات مش فاكر مين كان كاتبه بس خلانى افكر اكتب عن يوم معين هو كان يوم اجازة بس كنت متضايق فيه قوى مش عارف ليه بس قبل ما اسيبكوا تقروا ايه اللى حصل فى اليوم ده احب اقولكم انى مش كاتب عبقرى انا مجرد واحد بيكتب اى حاجة فمش ملتزم بأى حاجة

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

الساعة 2:5صباحاً قاعد فى اوضتى مش بعمل حاجة عندى ملل زهقان قرفان فجاءة مبقاش عندى اى رغبة انى اتكلم مش عاوز اتكلم مع اى حد او اعمل شات او اى حاجة كأنى رافض الكلام كله بفكر اخيط بقى و اخليه مقفول  مش عارف ليه !!!! فكرت اقرا قصة بس لقيت ان معظم القصص اللى عندى قريتها كذا مرة فكرت اقرا قصة انجليزى دورت لقيت قصة روبنسون كروز قريت اول صفحتين افتكرت انى قريتها قبل كده و كمان اتفرجت على الفيلم صدقونى قصة بايخة جدا جدا جدااااااااااااااااااااااا و ممكن تكرهوا حياتكم من كتر الرتابة و الملل اللى فيها

و بعدين اعمل ايه ؟؟؟؟؟؟؟؟؟؟ اه فكرة ليه مكتبش اللى انا عملته النهاردة...... تخيلوا كده انا عملت ايه النهاردة؟؟؟.... لالالا يا جماعة عاوزكم تبطلوا تتفرجوا على افلام اكشن مش معقولة كده الافلام دى لحست مخكوا صدقونى انا مقمتش النهاردة على صوت مسدسات و لا انفجارات و لا ناس بيطاردونى و لا فى سى اى ايه و كى جى بى عاوزين يجيبوا اجلى اقولكم ايه اللى حصل من ساعة ما قمت لغاية دلوقتى

انا صحيت الساعة 12:5 طبعاً نطيت من على السرير عشان مش كنت صليت الصبح عقبال ما دخلت الحمام و كنت بتوضأ كان الظهر اذن... حاجة تزعل حقيقى المهم خرجت اصلى الصبح و بعدين الظهر و رحت فطرت جيت ادخل النت لقيته مش موجود و كله من الشركة الغبية المتعاقدين معاها ده ساعات بتكون الساعة 5 الفجر و الاقيه قاطع برضه اليوم مبشر من اوله بعد كده قولت العب على الفوتوشوب شوية مكنش فى حاجة معينة فى دماغى اعملها و النتيجة انى قعدت اضيف فى الصور و العب فيها من غير اى لازمة و بعدين قولت لنفسى ايه الهبل اللى بعمله ده رحت قافل البرنامج و فتحت  nfs  لعبة

قعدت العب شوية لغاية ما زهقت خرجت منها و حاولت افتح اى صفحة و الحمد لله النت رجع قعدت افتح مواقع كتيرة (ويكيبديا و العربية و الجزيرة و الهاى 5 و جينيدس )فضلت كده لغاية ما العصر اذن و والدى رجع من الشغل قمت اتوضيت و صليت العصر و اتغدينا بعد كده قعدت الف فى الشقة اطلع من اوضة اخش اوضة بصيت فى المراية لقيت شعرى طويل رحت نزلت للحلاق .. الحلاق كان فاضى مش عنده حد و انا جيتله قعد يرغى و هو بيحلق ليا و انا مش عاوز اسمعه فكنت برد باه و لا من غير ما اعرف هو بيقول ايه رجعت البيت على الساعة  7:25 اول مرة احلق بالسرعة دى المهم غسلت راسى  كان اخويا قايل ليا انى اجيبله كشكول محترم عشان يقدمه لبتوع العسكرية رحت جايب كشكول على رسمة بطوط ههههههه مش عارف ليه بعد كده قعدت على الجهاز تانى فتحت الماسنجر لقيت 6 من اصحابى اونلاين الصراحة مكنتش عارف اكلمهم فى ايه او تقدروا تقولوا مكنتش لاقى موضوع نتكلم فيه رحت كاتب تحت اسمى الجملة دى (الصراحة مش لاقى كلام اقوله .... اقولكم روحوا ناموا احسن)هههههه حاجة غريبة اوى فضلت قاعد شوية جه واحد صاحبى من الكلية اسمه مصطفى و للاسف على الياهو فمش قرا اللى انا كاتبه تحت اسمى و قالى صباحوا رحت قايل مساءوا و بالرغم انى كنت بتكلم من تحت الضرس و بقول ردود غريبة الا انه كان عادى و بارد بطريقة غريبة قعد يتكلم عن وزارة الخارجية و فضايحها و انا ساكت بعد كده رحت سايبه و قمت من على الجهاز عشان اخويا كان عاوزه و مقعدتش تانى رحت اتعشيت  المهم دلوقتى الساعة 3 الا تلت و انا رايح انام سلاممممم

<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<

و بكده خلص اليوم مش عارف انا كل ما اقرا اللى حصل فى اليوم ده اقول ايه الملل ده الواحد كان ساكت على نفسه ازاى؟؟ يلا بقى سلام دلوقتى